BR LA UNION – Kinumpirmar ti militar a napatayda ti dua a lider ti New People’s Army (NPA) iti maysa nga engkuwentro idiay Hacienda Paraiso, Barangay Caduhaan, Cadiz City, Negros Occidental idi Sabado, Marso 8.
Segun kenni 1st Lt. Dan Carlo Samoza, civil-military officer ti 79th Infantry Battalion (IB) Army, ti operasyon ket paset ti gannuat ti militar iti nasao a lugar kalpasan ti immuna nga engkuwentro idi Pebrero 13.
Innayonna a nakalaban iti tropa militar dagiti pito a rebelde ti NPA idi pasado ala una ti parbangon.
Nakatayan ti dua nga NPA, a maysa a lalaki ken maysa a babai, nga addaan ti nangato a posisyon iti regional command ti NPA, partikular iti Komiteng Rehiyon-Negros Cebu Bohol Siquijor.
Agingga ita ket saan pay a nangted ni Samoza iti kanayunan a detalye maipapan iti agtultuloy nga operasyon iti lugar.
Maipalagip nga idi Pebrero 13, inabak ti 79th IB iti gandat a panagkikil ti NPA nga adda pakainaiganna iti umadanin a May 12 midterm elections.
Iti nasao nga engkuwentro, nasugatan ti maysa a finance officer ti Northern Negros Front ket narekobre ti militar dagiti dokumentona a naglaon kadagiti napateg nga intelligence data.
