BR LA UNION – Nangisayangkat ti sabali nga imbestigasyon iti Commission on Human Rights (CHR) seknan iti nadara nga engkuwentro iti baetan ti Philippine Army ken New People’s Army idiay Negros Occidental idi Abril 19 a nakatayan ti 19 a tattao.
Segun iti CHR, adda “inconsistencies” iti pakabigbigan dagiti natay. Impaganetget ti militar nga agpapada a rebelde dagitoy, idinto nga ibagbaga met ti dadduma nga organisasyon nga adda sibilyan iti biang dagiti biktima.
Kabilang dagiti natay ket isuda Alyssa Alano, community journalist a ni RJ Nichole Ledesma, ken Filipino-American activists nga isuda Lyle Prijoles ken Kai Sorem.
Binigbig met ti NPA iti pannakatay ti maysa a lider da ken sumagmamano a kakadwa da, ngem impaganetget nga adda dagiti sibilyan a natay iti insidente.
Segun ti CHR a kasapolan ti nainget a beripikasyon iti agsupadi a waragawag, ken iti sidong ti International Humanitarian Law, saan a mabalin a basta puntiryaen dagiti inosente a tao wenno iti maysa a gagangay a lugar.
Naipadamag pay a gasut a residente ti naapektaran iti rinnupak.
Segun iti Kilusang Magbubukid ng Pilipinas ken Tanggol Magsasaka, nasurok 650 a tattao manipud iti 168 a pamilya ti immakar idiay Barangay Salamanca ken Barangay San Jose idiay Toboso.
Kinuna met ti militar a naikoordinar ti panagakar iti lokal a gobyerno.
Nagpanawagan ti CHR ti maysa a napartak, patas, ken independent nga imbestigasyon, ken kooperasyon manipud iti amin a benneg.
