BR LA UNION – Nalpasen iti search and retrieval operations nga insayangkat ti naduma-duma nga ahensya ti gobyerno para iti panangsapol dagiti pasaheros ti nagsuwek a Cessna plane idi Miyerkoles, iti kabakiran idiay Brgy. Navarro, ili ti Tubajon, probinsya ti Dinagat Islands.
Daytoy ket kalpasan a marekober dagiti responders iti mapapati a bangkay ti tao ngem napirsa-pirsay dagitoy gaputi kapigsa ti panagbettak.
Dagiti narekober a paset ti bagi ti tao ket maipasidong iti umiso a beripikasyon.
Naala dagiti otoridad iti crash site iti sumagmamano nga arwaten ken mapapati a paset a konektado kadagiti pasahero ti eroplano.
Naileppas iti operasyon kalpasan iti insayangkat a kasapolan a proseso ken panagamiris, kagiddan ti panangipalubos dagiti pamilya ken lokal a gobyerno ti Tubajon nga idaulwan ni Mayor Fely Pedrablanca, a nang-demobilize iti Incident Management Team agarop alas-4:30 ti malem.
Nagyaman met dagiti mangibagbagi ti pamilya iti Barangay, Municipal ken Provincial Government Units, ken amin a national response agencies ken community volunteers a timmulong iti misyon iti sidong ti unified command system ti Incident Management Team (IMT), a nangsiguro ti coordinated, sistematiko, ken natalged nga operasyon iti lugar ti insidente.
