BR LA UNION – Kinumpirma ti Philippine Consulate General (PCG) idiay Hong Kong iti panagpukaw ti dua nga Overseas Filipino Workers (OFWs).
Nabigbig dagitoy nga isuda Imee Pabuaya , 24-anyos ken Aleli Tibay, 33-anyos.
Naudi a nakasarita ni Pabuaya iti pamilya na idi Oktubre 4 ngem kalpasan ti sumagmamano nga oras ket naka-awat ti kabsat na a ni Irene ti mensahe manipud iti employer na a mangibagbaga a mapukpukaw ti nasao nga OFW.
Maibasar iti report a segun kenni Irene, ti kabsat na a ni Imee ket 9 a bulan na pay laeng idiay Hong Kong ken maipagarop a karelasyon na ti padana a domestic helper a ni Aleli, a walo a tawenen nga agtrab-trabaho iti nasao a pagilian.
Segun kenni Consul General Romulo Victor Israel Jr., saan pay a kinumpirma kadakuada ti Hong Kong immigration nu rimwar idiay Hong Kong dagiti dua.
Kinuna na nga agtultuloy ti pannaki-koordinar da kadagiti otoridad.
Naudi a nakita dagiti dua idi Oktubre 4 idiay Yeung Uk Road, ti sikat nga hiking spot idiay Tsuen Wan district.
