BR LA UNION – Agtultuloy a ngumatngato ti bilang dagiti natay kalpasan iti magnitude 7.8 a gingined a timmama iti sumagmamano a paset ti Mindanao idi Hunyo 8.
Segun iti Office of the Civil Defense (OCD), umaboten iti 46 ti bilang dagiti natay bayat nga 630 dagiti nadundunor ken 17 pay ti mapukpukaw.
Agtultuloy met iti isay-sayangkat a search and rescue operations kadagiti lugar a nakaru a naapektaran ti kalamidad.
Bimmisita ni Presidente Ferdinand Marcos Jr. idiay General Santos City tapno personal a mangisayangkat ti inspeksyon kadagiti nadadael nga imprastraktura ken indaulwan na iti relief operation.
Iti nasao a panagbisita, inyanunsyo ti Presidente a mangipaay iti gobyerno ti P50,000 nga ayuda iti tunggal pamilya a napukawan ti ipat-pateg ti biag gaputi gingined.
Nangilatang pay iti Department of Labor and Employment (DOLE) ti agingga P15,000 a tulong-pinansyal para kadagiti mangmangged a naapektaran ti didigra.
Kabayatanna, mabalin a makaawat ti P30,000 funeral assistance iti pamilya dagiti mangmangged a natay.
Kabilang kadagiti kauddian a biktima a nasarakan ket ti maysa nga empleyado a naipit iti narsuod a supermarket idiay General Santos City.
Dakkel pay iti epekto ti gingined iti sektor ti edukasyon.
Nasurok a 1,100 pagadalan idiay Mindanao iti nadadael bayat a suspendido pay laeng ti klase iti nasurok kumurang nga 8,000 a pagadalan.
Segun iti Department of Education, posible a sumagmamano pay a bulan ti urayen sakbay a maisubli iti normal nga operasyon iti sumagmamano a pagadalan.
Kabayatanna, parigat pay laeng kadagiti ahensya ti gobyerno iti panagitulod ti tulong iti sumagmamano a lugar gapu kadagiti nadadael a kalsada ken landslide. Gaputi dayta, nagusar ti helicopter iti Armed Forces of the Philippines tapno maitulod dagiti taraon, agas, ken dadduma pay a kangrunaan a kasapolan iti komunidad a narigat a madanon.
Segun iti Presidente, naisublin ti supply ti koryente iti nasurok-kumurang nga 85 a porsyento kadagiti apektado a lugar.
In-inut metten a maisub-subli iti komunikasyon ken suplay ti danum iti naduma-duma a komunidad.
