BR LA UNION – Arestado iti dua nga street-level drug personalities iti insayangkat dagiti otoridad nga anti-illegal drug operation idi rabii ti Miyerkoles, Hulyo 30, 2025 idiay Barangay Catbangen, City of San Fernando, La Union.
Dagiti suspek ket agpada nga agtawen ti 28 ken residente ti nasao barangay, maysa kadakuada ti awanan trabaho bayat a ti maysa ket agtrab-trabaho kas office clerk.
Iti buy-bust operation nga indaulwan ti City of San Fernando Police Station ket nagresulta iti pannaka-kumpiskar ti tallo a heat-sealed transparent plastic sachet ti mapapati a shabu, aganay 7 gramo ti kadagsen na, ken mapatta-patta nga agbalor ti Php 47,600.00
Dadduma pay a nakumpiskar dagiti otoridad ket pakaibilangan ti dua (2) a cellular phones, buy-bust money, ken drug paraphernalia.
Naipatungpal ti legal a proseso a kas iti inventory ken pannaka-marka dagiti nakumpiskar nga items babaen iti panangimatang dagiti supek ken witnesses.
Naiturong da nga immuna iti City Health and Wellness Center para iti medico-legal examination sakbay a naipasidong iti kustodiya ti City of San Fernando Police Station para iti dokumentasyon.
Sumangsango dagiti suspek iti kaso a panaglabsing iti Republic Act 9165 wenno Comprehensive Dangerous Drugs Act of 2002.
