Nasurok tallo a bulan kalpasan ti panagduprak ti Bagyong Tino wenno Kalmaegi ti international name na, 214 a pamilya idiay Talisay City, Cebu ti agtaltalinaed kadagiti tents kalpasan nga iyanod ti layus ti babbalay da sadiay Mananga River.
Karaman kadagiti apektado dagiti natataengan, masikog, ken dagiti ubbing. Nupay nakaawaten ti inisyal a tulong Philippine Red Cross (PRC), temporario laeng daitoy ken saan nga umdas para ti napaot a pagnaedan.
Adda met dagiti intukon a relocation sites ti gobierno ngem adu dagiti saan a makaakar agsipud ta kasapulan paylaeng ti P15K a down payment ken P1,700 a binulan a tinnag iti las-ud ti tallo a tawen, malaksid pay ti mismo a panagpatakder ti balay.
Iti agdama ket agtaltalinaed dagiti pamilya sadiay San Roque ken Biasong Tent Cities nga asideg metlaeng ti karayan ken agpegpeggad iti pangta ti layus.
Nagkeddeng ti Philippine Red Cross a mangipasdek kadagiti 300 a permanente a sangkabalayan idiay Cebu ken nagpanawagan ti kanayonan a suporta manipud kagiti donors ken partners para ti panagbangon dagiti apektado a pamilya.
