BR LA UNION – Agtultuloy a ngumatngato ti bilang dagiti natay iti Binaliw Landfill idiay Cebu, nga umaboten ti 11 a tattao ita nga aldaw ti Martes – Enero 13, bayat nga agtultuloy iti search and rescue operations para iti maikalima nga aldaw.
Iti kauddian a datus, umaboten ti 11 ti natay, 12 dagiti nasugatan, ken 25 pay nga indibidwal ti mapukpukaw seknan ti insidente.
Agtultuloy ti nainget a panagsapol ken panangisalbar dagiti otoridad iti laksid ti peligro a kondisyon iti lugar.
Iti eksklusibo nga interview ti Bombo Radyo Cebu kenni FCSUPT. Fred Trajeras Jr., Regional Director ti Bureau of Fire Protection Region 7, kinumpirma na nga agtul-tuloy ti operasyon da tapno matunton dagiti mapukpukaw a biktima.
Segun kenni Trajeras, adda dagiti bangkay a nakita iti tengnga ti operasyon, ngem saan pay nga opisyal a nairaman iti listaan dagiti natay agsipudta saan pay a natalghed ken posible ti dagus a retrieval gaputa delikado ti kasasaad iti sumagmamano a paset ti landfill.
Iti agdama, adda ti 64 nga standby rescuers manipud BFP a naka-deploy idiay Binaliw Landfill, kadwa da ti naduma-duma nga ahensya ti gobyerno.
Ranta ti maikalima nga aldaw ti operasyon a masarakan ken marekober dagiti mapukpukaw.
Impaganetget ni Trajeras a saan a pumanaw dagiti tao da agingga a saan a malpas iti operasyon, ken aramiden da amin a kabaelan da tapno agballaygi ti search and rescue mission.
Innayon na pay a maibasar iti report dagiti team leader ken supervisor iti lugar, sumagmamano pay a bangkay iti nasaripatpatan ngem saan a dagus a madanon gaputa nangato ti peligro.
Gaputi dayta, urayen da pay a makumpleto ti clearing operations babaen kadagiti heavy equipments tapno masiguro a natalged iti panangala kadagitoy.
