BR LA UNION – Umaboten ti 26 dagiti nailista a natay ken 22 iti mapukpukaw kalpasan ti panagduprak ti bagyo Bualoi idiay Vietnam idi Lunes, September 29.
Ibil-bilang ita ti Vietnam a kapigsaan ti bagyo Bualoi a dimmuprak iti nasao a pagilian ita a tawen, gaputa nangparnuay daytoy ti nakaru a panaglayos ken landslides iti amianan a parte ti pagilian.
Segun iti Vietnam government, nakailista da pay ti saan a bumaba iti 88 a tattao a nasugatan, nasurok kumurang a 100,000 a babbalay ti nailista a nagpasar ti minor damage ken mapatta-patta a 10,000 ektarya a kapagayan ken kataltalunan iti limned ti layos.
Maibasar met iti report ti Vietnam weather agency, limbes iti 300mm ti naibuyat a tudo iti sumagmamano a paset ti pagilian ken nagpakdar ti ahensiya iti napipigsa a panagtudo, napigsa nga angin ken panagkimat gapwanan ti dakes a panawen.
Iti agdama, layos pay laeng iti amianan a paset ti pagilian ken agtaltalinaed a nakarikep ti sumagmamano a kalsada ken naputed ti suplay ti kuryente iti lugar.
