BR LA UNION – Nakatuding nga iyemplementar ti Department of Agriculture (DA-RFO 1) iti tulong a fuel subsidy para kadagiti rehistrado a food lane truck owners iti rehiyon uno.
Daytoy ti inyanunsiyo ni Ms. Edylyn Goldara, mangidadaulo ti Agribusiness Industry Support Section iti Agribusiness Marketing Assistance Division kabayatan ti naisayangkat a seminar orientation ti Daily Price Index Implementation iti sidong ti Republic Act 12022 (Anti-Agricultural Economic Sabotage).
Iti sidong ti programa, maipaayan ti ₱2,000 weekly fuel subsidy wenno kaibatugan ti agingga ₱10
kada litro a diskuwento para kadagiti food lane truck owners a naiyisyuan ti foodlane certificates.
Nairanta ti nasao nga addang tapno makissayan ti dakkel a gastos iti transportasyon dagiti lokal a biyahero nangruna dagiti agbibiyahe kadagiti produkto agrikultural iti naduma-duma a destinasyon ken mapatibker ti presyo dagiti magat-gatang iti merkado.
Target ti DA-RFO 1 nga iwaras ti nasao a fuel subsidy kadagiti 287 a rehistrado a food lane truck owenrs iti intero a rehiyon uno, ken makaawat da ti pakabuklan nga ₱8,000 iti uneg ti maysa a bulan.
Dagiti kuwalipikado a benipisyaryo ket makaala da ti diskuwento kadagiti akreditado a gasoline stations babaen iti panangipakita ti valid ID ken sertipikasyon.
