LA UNION – Arestado iti maysa nga aglive-in partner iti insayangkat a buy bust operation iti nagtipon a puwersa dagiti otoridad iti batog a mismo ti Don Mariano Marcos Memorial State University wenno DMMMSU MLUC, partikular iti sakop ti Barangay Sevilla, San Fernando City, La Union pasado alas 7:00 idi rabii ti Abril 29.
Dagiti suspek ket nabigbig iti nagan a Jerome Erol ken Micha Angeles, residente ti Barangay Poro ditoy siyudad.
Nakumpiskar manipud kadagiti suspek iti nakurang 10 a transparent plastic sachet a maipagarop a naglaun ti shabu ken adda pay marijuana, pakairamanan iti naduma-duma a drug paraphernalia, cellphone, ken dadduma pay.
Maysa met a maipagarop a drug pusher iti inarestar dagiti otoridad iti insayangkat dagitoy a buy bust operation idiay Barangay Disso-or, Bauang, La Union.
Nabigbig daytoy iti nagan a Sonny Boy Cutara, 26-anyos, maysa a High Value Individual ken maipagarop a miyembro ti Alamangco Drug Group, residente ti Barangay Paringao ti nasao nga ili.
Kabayatanna, inarestar dagiti otoridad iti managan Rolly Olina, 56-anyos, residente ti Barangay Catbangen, San Fernando City, La Union gaputi kaso a panaglabsing iti RA 7610 wenno child abuse, a napasamak idiay Barangay Cabaroan ditoy siyudad.
Dagiti nasao nga indibiduwal ket pada-pada a naidatagan ti kaso ken naibalud dagitoy.
