LA UNION – Pakabuklan a 33 a baboy manipud Barangay Namtutan iti na-depopulate gaputi timpuar manen a sakit dagiti baboy nga African Swine Fever.
Iti interview ti Bombo Radyo La Union kenni Dr. Flosie Decena, City Veterinarian ditoy siyudad ti San Fernando, maysa a backyard hog raiser iti naapektaran ti nagsubli a sakit nga ASF.
Gaputi dayta, dagus kunana a nangipaulog ti advisory ni City Mayor Dong Gualberto seknan iti rumbeng nga aramiden tapno maatipa ti panagwaras iti sakit nga ASF.
Kabayatanna, binalakadan ni Dr. Decena, dagiti backyard hog raisers ditoy siyudad nga itultuloy ti panagtaraken ti baboy.
Kinuna na a saan a maupay iti panagraira manen iti African Swine Fever agsipudta ar-aramiden da dagiti addang tapno saan nga agwaras ti sakit.
Ngem kasapolan kunana iti tulong ken kooperasyon dagiti otoridad ken backyard hog raisers, tapno saan a makastrek ken agwaras ti sakit.
Idi napalabas a tawen, adda nasurok a 350 a backyard hog raisers ditoy siyudad ti nagparehistro iti opisina ti City Veterinary Office ken naipaayan amin dagitoy ti tulong manipud Department of Agriculture.
