Pina-deport ti Bureau of Immigration ti 35 nga Indonesian nationals a naarestar ti maysa nga raid iti illegal a Philippine online gaming operator idiay probinsya ti Cebu idi Miyerkoles.
Kinuna ni Immigration Commissioner Joel Anthony Viado a karaman kadagiti naarestar ket siyam nga babbai, a natiliw sadiay Lapu-Lapu City.
Indauloan ti Bureau of Immigration ti koordinasyon, kakadua dagiti Presidential Anti-Organized Crime Commission, National Bureau of Investigation, Armed Forces of the Philippines, Philippine Center on Transnational Crime, ken iti Inter-Agency Council Against Trafficking.
Kabayatan ti operasyon, natakuatan dagiti otoridad dagiti ginasut a foreign nationals nga adda amin pakainaiganda iti illegal online gaming operations iti uneg ti resort idiay Barangay Agus, Lapu-Lapu City.
Naamuan nga adda dagiti maar-aramat a work stations iti uneg ti resort a nakadulin iti publiko ken ditoy a maar-aramid dagiti llegal nga aktibidad.
Kabayatanna, karaman dagiti 35 nga Indonesian nationals iti blacklist ti Bureau of Immigration.
