BR LA UNION – Posible a sumrek iti Philippine Area of Responsibility (PAR) ti dua agingga uppat a bagyo iti pakabuklan ti Setyembre.
Maibasar iti climatological data ti state weather bureau, uppat a cyclone track iti posible a pagnaan dagiti nasao a dakes a panawen.
Umuna, posible a dumalan dagiti bagyo iti northeastern part ti Philippine Area of Responsibilities (PAR) ken agturong idiay Japan wenno Korea a saan nga agla-landfall iti sadinuman a paset ti Pilipinas.
Masansan a saan a maka-apektar ti habagat dagiti nasao a cyclone track, segun iti weather bureau.
Mabalin met a dumalan dagiti nasao a bagyo idiay northwestern part ti PAR ken agturong idiay Taiwan.
Iti kasta a sitwasyon, posible a papigsaen ti bagyo iti southwest monsoon.
Posible nga aglandfall dagitoy iti northern wenno extreme northern Luzon sakbay nga agturong iti direksyon a pa-Hong Kong ken China.
Maudi, mabalin nga aglandfall ti sumagmamano kadagitoy wenno dumalan iti southern part ti Luzon ken agturong idiay Vietnam.
Iti sumaruno a nagan dagiti bagyo ditoy Pilipinas ket Kiko, Lannie, ken Mirasol.
