LA UNION – Lima a tattao ti natay iti napasamak nga uram iti residential area idiay Barangay San Roque siyudad ti Navotas itay agsapa ti Sabado, Disyembre 14.
Segun iti Bureau of Fire Protection (BFP), uppat kadagiti biktima ti trahediya ket agpapada a menor de edad.
Naiturong dagiti 5 a biktima iti ospital ngem naideklara a dead on arrival gaputi nalang-ab da nga asok manipud iti uram.
Maibasar iti report, timpuar ti uram idiay Governor Pascul Street agarop alas-7:14 ti agsapa ken naan-anay a nasebseban agarop alas-7:53 ti agsapa.
Iti imbinglay a post ni Navotas city Vice Mayor Tito Sanchez, nagramot ti uram iti maysa a clip fan.
Nagpalagip daytoy kadagiti Navoteño nga agbalin nga alerto ken naannad.
Kinuna na nga ugalien nga amirisen dagiti arwaten ti pagtaengan tapno masiguro iti kinatalged ti pamilya ken komunidad.
Kabayatanna, kas tulong kadagiti apektado a pamilya, rinugyanen ti Navotas City Social Welfare and Development Office (CSWDO) ti maki-koordinar kadagiti apektado a pamilya tapno maipaayan da iti kaskenan a tulong.
Inawat amin dagiti maseknan a pamilya dagiti biktima iti libre a cremation ken burial services nga indiaya ti lokal a gobyerno.
