BR LA UNION – Nagtignay a dagus iti Department of Social Welfare and Development (DSWD) tapno tulongan ti maysa nga 11-anyos a balasitang manipud Camarines Sur a nagsurat kenni Presidente Ferdinand Marcos Jr. mainaig iti mapapati a panangabuso ti maysa nga opisyal ti barangay.
Kinumpirma ni DSWD Secretary Rex Gatchalian a nakipagkita iti balasitang ken iti management ti shelter a nangkupkop kenkuana, maiyannurot iti bilin ti Presidente a tamingen ti nasao a sitwasyon.
Tultulongan pay ti DSWD iti Redeemer Homeless Mission, maysa a pagkamangan nga agserserbi a temporaryo a pagtaengan dagiti pamilya a naapektaran ti kinapanglaw ken kalamidad.
Imbes nga ipaserrana daytoy gapu iti kinakurang ti dokumento, tulongan ti ahensiya ti pasilidad a mangkumpleto kadagiti kasapulan a permit.
Segun iti dadduma a residente, makapaspasar da ti harassment, pakairamanan ti pannakaputed ti koryente ken suplay ti danum, ket im-imbestigaran metten daytoy dagiti otoridad.
Kabayatanna, tultulongan pay ti DSWD iti maysa nga ubing nga addaan ti special needs a mapapati a namin-adu a daras a rinames ti anak ti maysa nga opisyal ti barangay.
Agtultuloy a maipapaayan iti pinansiyal ken psychosocial assistance ti biktima ken ti pamilyana .
Segun iti Philippine National Police (PNP), naipila ti kaso a rape idi 2023 ken agdama a maus-usig, idinto a nakabalud ti akusado.
Im-imbestigaran pay dagiti pulisiya ti dadduma pay nga alegasyon, kas iti maipagarop a panangkidnap ken pannaka-regreg iti sikog ti biktima.
Impasigurado ti gobierno nga agtultuloy a suportaranna dagiti biktima ken siguradwen a masungbatan dagiti mairam-raman iti sidong ti linteg.
