LA UNION – Lima nga estudyante nga annak ti mangngalap ditoy siyudad ti San Fernando iti naipaayan ti uppat a tawen a libre a panagadal, manipud school year 2022 agingga 2026.
Daytoy ket iti sidong ti Fisheries Scholarship Program (FSP) ti Bureau of Fisheries and Aquatic Resources (BFAR).
Maysa daytoy a programa ti gobyerno a mangipaay iti full college scholarship kadagiti kuwalipikado nga high school graduates, para iti kurso a Bachelor of Science in Fisheries (BSF).
Nakapauneg iti kontrata a pinirmaan dagiti estudyante ken nagannak dagitoy, a maikkan da iti P5,000 a monthly allowance malaksid pay nga ibaklay amin ti BFAR iti gastos iti eskuwelaan agraman ti bayad ti libro kada semestre a P2,000.
Apaman nga agturpos dagiti scholar kalpasan ti uppat a tawen, tulongan pay ti ahensiya a makastrek dagitoy iti trabaho.
Iti Fisheries Scholarship Program ket tinawen nga ipapaay ti BFAR iti tarigagay a tulongan iti annak dagiti mangngalap a makapagturpos iti kolehiyo ken maital-o ti panagbiag dagitoy.
