Nakasaganan ti legal defense team ni sigud a Presidente Rodrigo Duterte para ti confirmation of charges hearing sadiay International Criminal Court (ICC) a nakatuding a marugian inton Setyembre 23, 2025.
Maibasar iti dokumento a maisumbitir ti Pre-Trial Chamber I idi Agosto 22, imbatad ni Nicholas Kaufman a mangitukon da ti tig-30 a minutos para ti opening ken closing statements bayat a tallo agingga uppat nga oras met para iti oral presentation ti depensa.
Ti panagdengngeg ket paset ti proseso tapno madakamat nu adda iti umdas nga ebidensiya nu kasta ket maammoan nu ituloy pay ti kaso kontra kenni Duterte mainaig ti crimes against humanity na iti kontrobesyal a kampanya kontra droga.
Segun iti report, nasurok 7K a tattao iti natay kadagiti operasyon manipud 2016 agingga 2019, nupay mabalin a dumanon ti agingga 30K ti aktwal a bilang na kas pinasingkedan dagiti human rights groups.
Iti nagbalin a waragawag ni Kaufman ket kinunana a saan a nakaaramid ti krimen ni Duterte nu di ket nagserbi laeng isuna ditoy pagilian nga umno ken adda iti maipagpannakkel na kadagiti adu a tawen ti serbisyo publiko.
Namnamaen ti kampo nga ipamaysa ti depensa dagiti legal nga argumento mainaig ti hurisdiksyon ti ICC, panagbalin a “politically-motivated” ti kaso, ken kaawan ti direkta a koneksyon ni Duterte kadagiti pammapatay.
Ti sigud a presidente nga agdama a nakadetenen sadiay Scheveningen Prison, The Hague Netherlands, ket inarestar dagiti otoridad ditoy Pilipinas idi Marso 11, agdama a tawen kas maibasar iti warrant of arrest nga impaulog ti ICC.
Aganay 300 a biktima ti war on drugs campaign ti nangisubmitir ti aplikasyon da a makipaset kadagiti pre-trial proceedings.
Saanen a kasapulan pay nga agbiahe dagiti biktima agturong idiay The Netherlands agsipud ta asikasoen daitoyen ti legal representatives da, pakairamanan ni Attorney Kristina Conti iti National Union of Peoples’ Lawyers (NUPL), Attorney Gilbert Andres, ken dadduma pay.
Nupay naglosolosen ti Pilipinas iti Rome Statute idi tawen 2019, pinagtalinaed ti ICC ti hurisdiksyon da kadagiti krimen kabayatan a miembro paylaeng ti pagilian manipud 2011 agingga 2019.
Nu mapasingkedan iti Pre-Trial Chamber dagiti akusasyon, agtuloy ti kaso ti maysa a full trial a mabalin nga agpaot ti sumagmamano a tawen. Nu saan met ket maibasura daitoyen, banag a pagam-amakan dagiti biktima ken dagiti abogado da.
Manamnama met nga agpaot ti panagdengngeg ti sumagmamano nga aldaw ket agbalin a sentro ti sangalubongan nga atensyon kas maysa kadagiti kadakkelan a kaso ti human rights accountability ti pakasaritaan ti Pilipinas.
