BR LA UNION – Maysa a resolusyon ti naidatag idiay Senado a mangal-allokoy kenni Senador Ronald “Bato” dela Rosa a boluntaryo a sumuko kadagiti otoridad ken dumalan iti umno a proseso ti linteg seknan ti warrant of arrest kontra kenkuana nga inruar ti International Criminal Court (ICC).
Iti Senate Resolution No. 395 ket indatag da Senador Francis “Kiko” Pangilinan, Vicente “Tito” Sotto III, Panfilo Lacson, Risa Hontiveros, ken Bam Aquino bayat nga agtaltalinaed idiay Senado ni dela Rosa iti sidong ti protective custody.
Idi Lunes, naipasidong ni dela Rosa iti protective custody idiay Senado iti sidong ti baro a liderato ni Senate President Alan Peter Cayetano.
Iti resolusyon, imbaga dagiti senador a nupay adda bileg ken pribilehiyo iti nangato a pagpandayan linteg ti Kongreso iti sidong ti Konstitusyon, saan met nga ipalubos ti Senado nga agbalin a sanctuary wenno mangipaay ti immunity manipud iti pannaka-aresto iti siasinuman a miyembro daytoy.
Inlawlawag da a ti immunity laeng a maipapaay kadagiti senador maiyannurot iti Konstitusyon ket limitado kadagiti kaso nga adda katukad a pannusa a saan a lumbes ti innem a tawen a pannakaibalud bayat nga adda iti sesyon ti Kongreso.
