LA UNION – Pito a miyembro ti pamilya agraman ti 8-anyos nga ubing ti natay iti napasamak a landslide idiay Barangay Labang, Ambaguio, Nueva Vizcaya idi kangitingitan ti panagduprak ti Severe Tropical Strom Pepito.
Maibasar iti report ti Nueva Vizcaya Provincial Disaster Risk Reduction and Management Office, napasamak ti insidente agarop alas 11:00 ti rabii idi Domingo, Nobyembre 17.
Maipagarop a nagaburan ti balay dagitoy iti nagregga-ay a daga manipud iti bantay.
Naisalbar dagiti tallo ngem daksanggasat a natay dagiti pito, ken narekobre metten ti bangkay dagitoy.
Dua kadagiti natay ket babbai ken lima a lallaki.
Iti agdama, saan pay a madalyasatan ti sumagmamano a kalsada idiay Nueva Vizcaya gaputi napasamak a sumagmamano nga insidente ti landslide.
Kabayatanna, umabot iti 4,297 nga indibidwal wenno 1,198 a pamilya ti nag-evacuate idi dimmuprak ti bagyo Pepito, a dimmanon ti kapigsa na iti super typhoon category .
Nailista pay dagiti nadadael ken narsuod a dike, natumba a poste, natay a dingwen ken saan pay a nabilang a nadadael a babbalay ken naitayab.
