BR LA UNION – Aksidente a naitinnag ti maysa a South Korean fighter jet dagiti bomba iti maysa a civilian area iti kangitingitan ti live-fire military exercises ita nga aldaw ti Huwebes, Marso 6 idiay Pocheon, South Korea, a nakasugatan ti 8 a tattao.
Iti maysa nga statement, imbaga ti SoKor air force, aksidente a natinnag ti KF-16 fighter jet iti MK-82 bombs iti ruar ti maysa a firing range a nangigubway ti perwisyu kadagiti tattao.
Ti nasao a fighter jet ket makipas-paset iti joint live-firing drills ti air force kadwa ti army.
Segun iti Pocheon disaster response center, 6 a sibilyan ken 2 a suldado iti nasugatan ken maag-agasan ita iti ospital.
Adda iti seryoso a kondisyon dagiti 4 a nasugatan nga agpapada a sibilyan ken 2 kadagitoy ket gangannaet, maysa a Thai ken maysa ti taga Myanmar.
Nagresulta pay ti insidente iti pannakadadael iti tallo a babbalay, maysa a Catholic church ken maysa a greenhouse ngem saan a direkta a timmama kadagitoy ti bomba.
Kimmiddaw metten ti dispensar iti air force iti insidente ken nagkari a mangipaay ti kompensasyon ken maitutop nga addang iti napasamak.
