BR LA UNION – Saan a bumaba iti walo a tattao ti natay gaputi awan sarday a panagtudtudo a gapwanan ti shear line idiay Davao Region, segun iti Office of Civil Defense (OCD)
Iti maysa nga interview, kinuna ni OCD Region XI Director Ednar Dayanghirang, uppat ti natay idiay Davao de Oro, bayat a ti dadduma ket nailista idiay Davao Oriental.
Amin a biktima ket natay gaputi landslide gapwanan ti agtultuloy a panagtudtudo kadagiti nasao a ;lugar.
Mainaig ti daytoy, mapatta-patta a 20,000 a pamilya ti naapektaran ti dakes a panawen idiay Davao de Oro ken umabot metten iti P376 milyon ti nadadael a produkto agrikultural iti nasao a probinsiya.
Impaganetget ni Dayanghirang a kasapolan a masimpa iti drainage system kadagiti kangrunaan a kalsada tapno maliklikan ti panaglayos.
Kinuna na a dagiti drainage iti national road ket saanen a maiyannatop iti agdama a klima, saan a kumpleto isunga saan a naannayas ti ayos ti danum nga aggapo iti kabantayan.
