LA UNION – Nakatuding a maitabon ita nga aldaw, Pebrero 12, 2022 ti pimmusay a ni City Councilor Ramon “Monetski” Ortega.
Sakbay a maitulod iti maudi a tanem na, maisayangkat nga umuna ti misa, agarop alas 10:00 ti agsapa, iti St. William Cathedral.
Naisayangkat met idi rabii iti misa ken necrological service iti mismo a Villa Vista ti Barangay San Vicente, San Fernando City, a dinar-ayan iti pamilya Ortega, cacabagyan, gagayyem, ken local officials manipud naduma-duma nga ili ditoy probinsiya agingga kadagiti opisyal ti barangay ditoy siyudad.
Maysa kadagiti nangipaay ti mensahe idi rabii ket ni Vice-Governor Mario Ortega, a nangipeksa ti ladingit iti untimely death ti kabsatna a konsehal ti siyudad ken ibilbilang na a “bestfriend”.
Inulila ni Councilor Monetski iti asawa na ken uppat nga annak daytoy.
Ni Councilor Ramon Ortega ket nagserbi a Committee Chairman iti Peace and Order; Trade, Commerce, and Industry; ken Committee on Transportation and Traffic Management.
Isuna pay iti Philippine Councilor’s League (PCL) Regional Chairman iti intero a Region 1.
Pimmusay ti konsehal idi Pebrero 3, agdama a tawen.
