LA UNION -Agsasaruno ita iti isay-sayangkat nga Anti-Illegal Gambling Operation dagiti otoridad tapno parmeken dagiti mangisay-sayangkat ti limed ken illegal a panagsusugal ditoy probinsiya a La Union.
Idi kalman, Setyembre 13, inarestar dagiti kameng ti Sudipen PNP, iti tallo nga indibiduwal, nga agtawen ti 72, 68, ken 61, agpapada a residente ti Barangay Turod, Sudipen, La Union.
Kinumpiskar dagiti otoridad iti inusar a baraha dagiti suspek ken bet money nga umabot ti P61.00
Kabayatanna, walo nga indibiduwal iti tiniliw dagiti otoridad iti nagsina a disso iti Barangay Parian ditoy siyudad ti San Fernando, La Union idi met laeng kalman, gaputi sugal a mahjong.
Dagitoy ket agpapada a naiyindurso iti San Fernando Police Station para iti umno a disposisyon.
Gaputi dayta, pakabuklan a 11 a tattao iti natiliw gaputi illegal gambling ken sumangsango ita dagitoy iti kaso a panaglabsing iti PD 1602.
