LA UNION – Inlawlawag ni Atty. Reddy Ceralde Balarbar, Assistant Regional Director ti COMELEC Region 1 ken Acting City Election Officer ditoy City of San Fernando, a karbengan ti maysa a botante nu tarigagay na iti single voting.
Iti eksklusibo nga interview ti Bombo Radyo La Union kenni Atty. Balarbar, imbaga na a mapasamak ti single voting nu iti maysa a kandidato ken dagiti supportersna ket kayatda a masiguro iti panangabak da iti maysa a lokal nga eleksiyon.
Iti automated election, nu saan a nasuratan ti amin a posisyon a nakailanad iti balota, maibilang latta daytoy a balido ngem nu nagsurok ti insurat a nagan dagiti kandidato iti balota, saan a basaen ti makina.
Ngem nu manu-mano ti panagbilang a kas iti kalkalpas a barangay election, mabilang latta iti botos a pakairamanan ti single voting, ngem saan a mairaman a mabilang ti surok iti naikeddeng a bilang iti mabotosan a posisyon.
