BR LA UNION – Iti kaunaan a gundaway iti pakasaritaan ti Pilipinas, inimpeach ti Kamara ni Vice President Sara-Zimmerman Duterte.
Daytoy ket kalpasan nga inaprubaran ni House Speaker Martin Romualdez iti maikapat a reklamo konra kenni Duterte.
Indaulwan ni Presidential son ken Ilocos Norte Rep. Sandro Marcos dagiti nasurok 200 a mammanday-linteg a nangipila iti impeachment complaint kontra kenni Vice President Sara Duterte.
Kinumpirma ni House Secretary General Reginald Velasco a naipila ti maikapat nga impeachment complaint nga addaan ti umdas a bilang tapno maipursige ti impeachment trial.
Maipalagip a nakarurod ni Rep. Marcos iti nagbalin a waragawag ni VP Sara a kalyen na iti bangkay ti lolo na ken ibelleng na idiay West Philippine Sea (WPS).
Kabilang iti ground ti impeachment ket conspiracy to assassinate President Ferdinand Marcos Jr., FL Liza ken Speaker Romualdez; malversation of P612.5-M confidential funds; bribery and corruption iti DepEd; extra judicial killings; betrayal of public trust ken large scale corruption.
Maibasar iti report, aganay pito ti articles of impeachment iti nasao a complaint nga agserbi a basaran dagiti senador nu maisayangkat ti panangusig, tapno maamwan nu natibker dagiti ebidensya, nga isuti mangpatakyas iti puwesto wenno saan kenni bise presidente Duterte.
Iti maikapat nga impeachment complaint ket naisina iti tallo nga immuna a reklamo kontra iti Bise Presidente. Saan metten a mairaman a denggen dagiti tallo a reklamo agsipudta naartapan ti maikapat nga impeachment nga inyindorso ti 215 a mammanday linteg.
Naidatag ti maikapat nga impeachment complaint idi kalman, Pebrero 5 ken napasingkedan iti maudi nga aldaw ti sesyon.
