BR LA UNION – Nainget a pinaglibakan ti Malacañang Palace ti report nga agwar-waras iti social media a tiniliw dagiti otoridad idiay US ni First Lady Liza Marcos bayat ti kaaddana idiay Los Angeles, California.
Segun kenni Palace Press Officer USec. Atty Claire Castro, awan ti kinapudno dagiti report a na-hold ti first lady idiay America wenno sadinoman a lugar iti lubong.
Ti palawag ti Palasyo ket kasaruno ti serye a post iti social posts a nalapdan ni First Lady Liza Marcos iti airport.
Kinumpirma ti Malakanyang a nagturong ni First Lady idiay LA tapno dumar-ay iti International Film Festival kas suporta kadagiti local artist ti pagilian.
Kinuna ti Malacañang a nakasublin ti First Lady ditoy pagilian idi Lunes Marso 10, agarup alas singko ti parbangon.
Maibasar iti social media post ni First Lady, nagturong idiay Los Angeles idi Marso 5 tapno tumabuno iti maysa a lunch kadwa dagiti Filipino-Americans a nabotosan ken nadutokan iti gobiyerno ti US.
March 6, simmango iti maysa a curated press conference idiay West Hollywoood ni Marcos kadwa na da Tourism Sec. Cristina Frasco ken DTI Sec. Ma. Cristina Roque.
Iti dayta met laeng nga aldaw, timmabuno ti First Lady iti thanksgiving dinner ken nagbuya iti maysa a documentary iti pagsinyan, a paset ti aktibidad ti Manila International Film Festival (MIFF).
Kabigatanna, Marso 7, timmabuno ni Marcos iti MIFF Gala Dinner, ket iti simmaruno nga aldaw, Marso 8, timmabuno iti MMFF 50: Konsyerto Para sa Filipino, a maysa a benefit concert para iti komunidad dagiti Filipino idiay Los Angeles.
Iti official Facebook page-na, idi Miyerkoles ti naudi a post ni FL Liza, a nangibinglayanna iti retrato kadagiti Girl Scouts of the Philippines para iti donation turn-over.
