Nagkedked ti Office of the Solicitor General (OSG) a mangibagi kadagiti opisial ti gobierno a napagsaludsodan dagiti petision a naipila iti Korte Suprema mainaig iti pannakaaresto ni dati a Presidente Rodrigo Duterte gapu iti warrant of arrest ti International Criminal Court (ICC).
Iti sidong ti linteg, agserbi ti OSG kas abogado ti gobierno.
Nupay kasta, iti pannakaiparangarang ti recusal idi Lunes, tinaginayon ni Solicitor General Menardo Guevarra ti natalged a takder ti OSG nga awan ti hurisdiksion ti ICC ken ti investigative, prosecutorial ken judicial system iti pagilian iti Pilipinas, isu a saan nga epektibo a mangibagi kadagiti respondents kadagitoy a kaso ken nagkedked a makipaset iti aniaman a pakainaigan iti dayta.
Kamaudiananna, kiniddaw ni Guevarra iti Korte Suprema nga usigen ti impila na a mosion.
Saan a dinakamat ni Solgen iti mosionna ti isyu iti International Criminal Police Organization (Interpol) a nangipakaammo iti Pilipinas mainaig iti arrest warrant iti dati a presidente.
Sakbayna, inkalintegan ti dadduma nga opisial ti gobierno a nupay awan ti hurisdiksion ti ICC iti PH, kameng pay laeng ti pagilian ti Interpol.
Kabayatanna, pinasingkedan met ti Korte Suprema ti mosion ni Solgen.
Segun iti SC spokesperson a ni Camille Ting, ti korte idi malem ti Lunes ket inawatna ti pannakaiparangarang ti OSG iti recusal manipud kadagiti consolidated habeas corpus petitions manipud kadagiti annak ni dati a presidente a ni Veronica “Kitty” Duterte ken ti Mayor ti siudad ti Davao a ni Sebastian “Baste” Duterte.
Pinasingkedan pay ti SC a nakaawatda iti motion a mangikkat ken ni Guevarra kas party respondent kadagiti kaso.
Malaksid kenni Guevarra, karaman pay kadagiti respondents iti petisyon ket isuda Executive Secretary Lucas Bersamin, DOJ Secretary Boying Remulla, PNP Chief Rommel Marbil, Police Major General Nicolas Torre III, DFA Secretary Enrique Manalo, Immigration Commissioner Norman Tansingco, AFP Chief Romeo Brawner, ken Undersecretary Antonio Alcantara ti Philippine Center on Transnational Crime.
