BR LA UNION – Husto laeng a madusa ti maysa a pulis a vlogger gapu iti dakes a panagsasao na kontra kenni Presidente Ferdinand Marcos Jr.
Reaksyon daytoy ti Palasyo kalpasan nga indarum ti Quezon City Police District ti nadakamat a pulis idi kalman.
Nakaswan ti nadakamat a police vlogger iti inciting to sedition ken panaglabsing iti Cybercrime Prevention Act gapu iti partisan post na iti social media.
Inaklon ni Palace press officer ken PCO Usec. Atty Claire Castro a nasdaaw ti presidente iti daytoy.
Segun kenni Castro, uray siasino a presidente ti pagilian, ket makigtot iti inaramid ti nadakamat a pulis.
Impaganetget ni Castro nga adda linabsing ti pulis iti inaramid na, kangrunaanna, adda nga aktibo iti serbisyo ken nasken nga impartial wenno non partisan iti posisyon na.
Kinuna na a maiparbeng laeng nga agsungbat ken disiplinaen ti nasao a pulis, maiyannurot iti itudtuding ti linteg.
Iti agdama, para iti Palasyo, maysa laeng daytoy nga isolated case, ngem naminsan pay nga imbaga ti Palasyo a nu adda makita a rason wenno panawagan para iti panangriribok, saan a konsintiren wenno palabsen ti gobyerno.
