Mangiwaras ti nasurok 140K a kapulisan ti Philippine National Police (PNP) iti mismo nga aldaw ti eleksyon inton Mayo 12 ita a tawen.
Segun kenni Directorate for Police Community Relations Director Major General Roderick Alba, dagiti maideploy ket maidutok kadagiti aganay 37,528 a voting centers ti intero a pagilian.
Kinunana nga ipamaysa ti hanay da a mangipaay ti umdas a seguridad ken proteksyon iti publiko tapno malapdan ti aniaman a kinaranggas a mainaig iti eleksyon. Panggep pay ti deployment ti panangpapigsa ti presensya ti kapulisan nangruna ta sumagmamano laengen nga aldaw iti nabatbati sakbay iti panagbobotos.
Nakatutok payen iti kapulisan kadagiti political rivalry iti paset ti Bangsomoro Atonomous Region in Muslim Mindanao (BARMM) nga addaan kadagiti aganay 63 a nailasin kas aktibo a grupo.
Kabayatanna, narugian metten ti panangipatulod kadagiti election paraphernalia kadagiti nagduduma a paset ti pagilian nu sadino ket nainget metlaeng a nakatutok ti PNP tapno agbalin nga epektibo a kabinnulig ti Commission on Elections (Comelec) para iti natalged a pannakaiturong dagitoy kadagiti voting centers.
Nangipatulod metten iti hanay ti 7,943 a kapulisan kas kanayunan a seguridad para ti nasurok 3K a board of election inspectors a maidutok idiay BARMM.
