BR LA UNION – Impaganateget ni Senator-elect ken Rodante Marcoleta a nakasagana isuna iti pad-padaanan nga impeachment trial kontra kenni Vice President Sara Duterte.
Nupay nangiyebkas ni Marcoleta ti kinasagana, inwaragawagna a rumbeng a pagsaritaanda nga umuna no ituloy wenno saan ti proseso ti panagusig, gaputa patienna nga adda depekto iti nagibasaran ti reklamo.
Kinunana a nakitana no kasatno ti pannakaipila ti reklamo ket biddut kunana iti basaran ken proseso.
Ni Marcoleta ket adda iti sidong ti “DuterTen” wenno Partido Demokratiko Pilipino (PDP) – Laban coalition nga inyendorso ni sigud a Presidente Rodrigo Duterte.
Nagun-od ni Marcoleta ti maikanem a puwesto iti senatorial race ita nga eleksiyon 2025.
Iti panag-serrek ti maika-20 a Kongreso, agserbi isuna a senator-judge iti impeachment trial kontra kenni VP Sara, a posible a mangrugi inton Hulyo 30.
