Opisyalen nga inawat ni Pope Leo XIV ti ”Ring of the Fisherman” wenno Piscatory Ring a simbolo ti otoridad ti Santo Papa kas kadwa ni San Pedro.
Naaramid ti seremonya kasaruno ti Mass of Inauguration idi Dominggo, Mayo 18 sadiay Saint Peter’s Square. Ti nasao a singsing ket inted kenkuana ni Cardinal Luis Antonio Tagle, Pro-Prefect ti Dicastery for Evangelization.
Maysa a kangrunaan a paset ti panagrugrugi kas baro a Santo Papa ti panag-awat ti Ring of the Fisherman ken maibilbilang a sagrado a senyales ken pagsungbatan ti maysa a lider ti Iglesia Katolika.
Addaan ti Piscatory Ring ti ladawan ni San Pedro a pagsarmingan ti trabaho na kas umuna a Santo Papa ken nangrugi idi pay maika-13 a siglo.
Kas maibasar metten iti Baro a Tipan ti Mateo 16:19, naipaay kenni Pedro dagiti tulbek ti Langit, ken mabasa iti Lucas 22:32, imbilin kenkuana ni Hesus a papigsaen ti pammati dagiti kakabsat.
Sigud daitoy a maus-usar kas ‘signet ring’ a pangselyo dagiti opisyales ti dokumento agingga 1842 ngem itan ket maar-aramat lattan kadagiti seremonyal a wagas.
Tunggal Santo Papa ket addaan ti kakaysuna a singsing. Nu matay ti Papa ket madadael iti singsing tapno awanen ti sabali pay a makausar.
Ipakpakita met ti singsing ni Pope Leo XIV ni San Pedro nga addaan ti tulbek ken lambat kas simbolo ti agtultuloy a misyon nga imbati ni Kristo kenni Pedro.
Iti panag-awat ti singsing ket opisyalen nga insuot ni Pope Leo XIV ti espiritual a pagsungbatan kas maika-266 a Kadwa ni San Pedro.
