Nakatuding a maipa-deport dagiti siyam a gangganaet a natiliwan ti nasurok P400-M undeclared cash sadiay Mactan-Cebu International Airport idi Mayo 9, tallo na aldaw sakbay iti 2025 midterm elections.
Segun kenni Immigration spokesperson Dana Sandoval, awan ita iti kustodiya ti Immigration dagiti nasao a suspek ngem iti kanito a malpas ti panagdengngeg ti criminal case da ket mai-turnover dan iti ahensya para iti deportasyon.
Apaman makabayad dagitoy iti piyansa ket mabalin da latta a maarestar babaen ti panagbalin da nga undesirable alien. Pito kadagiti siyam a gangganaet ket Chinese, maysa nga Indonesian, ken ti maysa pay ket manipud pagilian a Kazakhstan.
Sumangsago dagitoy iti kriminal a kaso para ti panaglabsing ti transportation and possession ti dakkel a gatad ti kwarta iti kangitingitan ti eleksyon ditoy Pilipinas.
Maipalagip a nasakote dagiti otoridad ti agingga 11 nga indibidwal sadiay Mactan-Cebu International Airport kalpasan a gandaten da a pastreken ti agingga kagudwa a bilyon a piso nga agturong idiay Maynila babaen ti private plane, ngem naharang dagitoy kalpasan a pinadas da nga i-bypass ti x-ray screening.
