BR LA UNION – Natay ti dua menor de edad kalpasan a nalmes dagitoy iti karayan idiay Aringay La Union idi Mayo 21, 2025 agarop 11:15 ti bigat.
Nabigbig iti dua a menor de edad a biktima nga agtawen ti 12 anyos ken 14 anyos agpada a residente ti San Simom West, Aringay La Union.
Maibasar iti inisyal a report, nagpakada iti nagannak da dagiti nasao nga ubbing a mapanda agdigos iti nasao a karayan kadwa da ti maysa pay a kasinsin da agarop alas 8:00 ti bigat.
Ngem kabayatan ti panagdidigos dagitoy, kellat a nakadanon dagiti biktima iti nauneg a paset ti karayan ken dagus met a dimmawat ti tulong iti kasinsin ti dua a menor de edad.
Iti panagresponde dagiti personnel ti Aringay MDRRMO ken kameng ti Aringay Police Station, dagus da a nangisayangkat ti retrieval operation tapno makita ti bagi dagiti ubbing.
Idi makita ken maiyaun iti bagi dagiti biktima manipud iti karayan, naipaayan dagitoy ti first aid, kas iti cardio pulmonary resuscitation wenno CPR.
Kalpasanna, naiturong ti biktima idiay La Union Medical Center, Agoo La Union ngem naideklara a dead on arrival babaen ti attending physician a ni Dr. Elizabeth Ines.
