BR LA UNION – Kinumpirma ni Senador Ronald “Bato” dela Rosa a naggapo iti opisina na iti kopya ti draft Senate resolution a mangkidkiddaw nga ibasura iti impeachment case kontra kenni Vice President Sara Duterte.
Segun kenni dela Rosa, isuna ti nag-initiate wenno nangirugi ti nasao a resolusyon.
Kinumpirma pay ti senador nga adda dagiti senador a sumup-suporta iti resolusyon ngem saanna pay nga inwaragawag nu manu ti bilang dagitoy.
Iti agdama, saan pay a madetermina ni dela Rosa nu kaatnu na nga idatag ti nasao a resolusyon gaputa repaswen na pay daytoy.
Kabayatanna, nakaawat ni Senate President Pro Tempore Jinggoy Estrada ti pisikal a kopya ti draft Senate resolution nga addaan ranta nga i-dismiss iti impeachment case kontra kenni Duterte.
Kinuna ni Estrada, idi pay Lunes a mairik-rikos ti nasao a resolusyon.
Inlawlawag ti senador a saan a naipa-pirma kenkuana iti resolusyon, nudiket naipabasa laeng ngem pam-panunutenna a naimbag nu agpirma wenno saan.
Uray ni Senadora Imee Marcos ket kinumpirma na a nakita na iti maipagarop nga agwar-waras a draft Senate resolution tapno ibasura iti impeachment case kontra kenni Duterte.
Segun kenni Marcos, maikatlo ti nasao a resolusyon a nakita na nga addaan tarigagay nga i-dismiss ti panagusig kontra iti bise presidente ti pagilian.
Kabayatanna, maipagarop a nakita met ni Senador Joel Villanueva iti kopya ti resolusyon iti group chat.
Ngem inlawlawag ti senador nga awan ti naipatulod a kopya ti Senate resolution tapno ipabasura iti impeachment case kontra kenni VP Sara.
