BR LA UNION – Nagresponde dagiti kameng ti San Fernando City Police Station iti naawat da a report agarop alas 11:55 ti rabii idi Martes, June 17 seknan iti maysa a pasyente ti Ilocos Training Regional and Medical Center (ITRMC) a maipagarop nga adda ikot na nga illegal a droga.
Iti pannakiuman iti Bombo Radyo kenni PMaj Lawrence Ganuelas, agdama nga information officer iti LUPPO, kinumpirma na a ti pasyente a nailinged iti nagan nga alyas “BEN”, 23-anyos, maibilang nga street level individual, residente ti Barangay Tanqui, ditoy syudad ti San Fernando ket na-admit iti ospital ti nasurok makalawas gapu iti self vehicular accident.
Ngem bayat ti panag-round ti doktor ken panang-check-up na iti nadunor a saka ti pasyente, maipagarop a naregreg ti maysa a plastic sachet ti maatap a shabu.
Segun kenni Major Ganuelas, ti nasao a maatap a droga ket agdagsen ti nasurok 0.5 grams ken mapatta-patta nga agbalor ti 3,400 pesos, ken karaman pay a nakumpiskar manipud iti ikot na ti maysa a pidaso ti straw tube ken aluminum foil.
Dagiti nakumpiskar a drug items ket naiturong ti forensic unit tapno maipasidong ti drug examination.
