BR LA UNION – Nangipeksa ti panagdanag iti gobyerno kasaruno ti insayangkat nga airstrikes ti Estados Unidos iti nuclear facility ti Iran idi weekend.
Nagpanawagan iti Department of Foreign Affairs (DFA) iti amin a benneg nga agsubli iti diplomatiko a panagsasarita tapno maliklikan a kumaru ti tensyon iti rehiyon.
Segun iti DFA, mangar-aramid da kadagiti posible a scenario ken iyap-update da iti contingency plans iti kanito a bumales ti Iran babaen iti panag-atake kadagiti base-militar ti U.S. idiay Middle East.
Maipalagip a mapatta-patta a nasurok maysa a milyon nga overseas Filipino workers (OFWs) ti adda idiay Middle East, kaadwan ket idiay Saudi Arabia, UAE, Qatar, ken Kuwait.
Kabayatanna, immani ti nagduduma a reaksyon iti intero a lubong iti panagatake ti Amerika kadagiti nuclear sites ti Iran idiay Fordow, Natanz, ken Isfahan.
Bayat a nangipeksa ti suporta iti Israel ken Canada ken nagpanawagan met ti de-escalation iti UN, UK, France, Australia, ken New Zealand.
Kabayatanna, inawagan met daytoy nga “ilegal” ti China ken Russia, idinto a nagballaag ti mas nalaw-lawa nga epekto iti Iraq, Oman, ken Qatar.
