BR LA UNION – Mairam-raman iti maysa a sikat a babai a “showbiz personality” iti kaso a panagpukaw dagiti nasurok 100 a mammallot ditoy pagilian.
Segun iti whistleblower a nailinged iti alyas “Totoy” kadwa dagiti sindikato wenno alpha member ti nasao a showbiz personality, malaksid pay dagiti 30 a pulis ken sibilyan a ninaganan ni Totoy a rumbeng a makaswan.
Nupay kasta, imbaga ni Totoy a saanna pay laeng a naganan, ngem kunana nga am-ammo dan daytoy.
Ni Totoy ket maipagarop a katalek ti “mastermind” iti pannaka-dukot ken pammapatay kadagiti sabungero.
Maysa isuna kadagiti innem a security guards ti Manila Arena, a masansan a pakaar-aramidan ti cockfight.
Dagiti nasao a guwardiya a pakaibilangan ni Totoy ket nakaswan ti kidnapping and serious illegal detention gapu iti panagpukaw dagiti sabungero.
Nagrekomenda ti Manila court iti piyansa para iti temporaryo a pannakawaya-waya dagiti suspek ngem kinanselar ti Court Appeals iti piyansa gaputi kadawatan ti pamilya dagiti biktima.
Immandar met ti Department of Justice (DOJ) iti pannaka-arestar manen dagiti innem a security guards.
Tarigagay ita ni Totoy nga agbalin nga state witness iti kaso dagiti mapukpukaw a sabungero, a segun kenkuana ket naibelleng idiay Taal Lake, gaputi panagamak para iti biag na.
