Ngimmato iti bilang dagiti nasaripatpatan a barko ti China idiay West Philippine Sea idi napalabas a bulan ti Hunyo.
Maibasar iti monitoring ti Philippine Navy, impadamag ni Navy spokesperson for WPS Rear Admiral Roy Vincent Trinidad a 49 iti pakabuklan a bilang dagiti barko ti China a nasaripatpatan kadagiti sumagmamano a features sadiay West Philippine Sea pakairamanan iti Bajo de Masinloc, Ayungin Shoal, ken Pagasa Island.
Dagitoy a barko ket rumuar-umuneg kadagiti nadakamat a maritime features ti pagilian.
Daytoy iti kangatwan a bilang ti Chinese vessels a nailista maidasig kadagiti napalabas a lima a bulan ti agdama a tawen.
Innayon pay ni Rear Admiral Trinidad, awan ti direkta a basaran no apay ta ngimmato iti bilang dagiti barko ti China idiay WPS ngem posible a gapo iti panawen, deployment cycle, maintenance, ken repair.
Iti laksid daytoy ket agtaltalinaed nga alerto iti sitwasyon iti Philippine Navy ken impasigurado iti agtultuloy a panangipakita ti nainget a panagbantay ken presensya iti maritim domain ti pagilian. #
