Impaganetget ni Mamamayang Liberal (ML) Partylist Representative Leila De Lima a ti panagdepensa iti West Philippine Sea (WPS) ket saan a panangikarit ti gyera nu di ket panag-demand iti dignidad.
Inyunay-unay na a ti WPS ket kukua ti Pilipinas a nasken a raemen dagiti sabali a pagilian.
“Defending the WPS means demanding dignity, not provoking war. It is to say, with clarity and without fear: “This is ours. Respect it.” As a legislator, a former political prisoner, and a Filipino who knows what it means to be silenced for standing up for what is right, I lend my full voice to this cause”
Daitoy iti kinuna ti mamanday-linteg kasaruno ti maika-9 nga anibersaryo ti naisangsangayan a balligi ti Pilipinas iti 2016 arbitral ruling a nangideklara nga awan iti legal a basaran ti 9-dash line claim ti China iti mapagsusupiatan a kabaybayan a sakopen met ti West Philippine Sea.
Segun kenni De Lima, babaen daitoy a ruling ket binigbig ti intero a lubong iti WPS kas teritoryo iti Pilipinas kas maiyannurot ti international law.
Nupay kasta, kinunana a daitoy a balligi ket dapat nga ipa-biag ti tinggal Pilipino, maisuro ken madepensaan.
Nadakamat na pay a sumali isuna ti WPS bloc iti Kamara de Representantes a nabiit pay ket impila ti grupo dagiti gakat ken resolusyon a panggep nga ituloy ti legal a balligi ti Pilipinas iti nasao a paset ti kabaybayan.
Karaman ditoyen ti House Bill No. 1625 a nangmandato ti panangikadwa ti isyu ti WPS iti curriculum ti agpada nga elementarya ken high school.
Iti met House Bill No. 1626 ket mangidekdeklara ti Hulyo 12 kas National WPS Victory Day a maysa nga special working holiday kasta met iti House Resolution No. 39 a mangpanpanawagan iti panagadal iti relasyon ti Sister City kadagiti Chinese cities.
Kamaudiananna ket pinaregta ni De Lima iti publiko nga ilaban ti karbengan ti pagilian idiay West Philippine Sea.
