BR LA UNION – Agpada a simrek iti welterweight limit a 147 pounds da Pinoy boxing icon Manny Pacquiao ken American boxer Mario Barrios.
Iti naisayangkat a weigh-in idiay Las Vegas, agsapa ti Sabado ditoy Pilipinas, ket nagtimbang ni Pacquiao ti 146.8 pounds bayat a ni Barrios ket nagtimbang ti 146.2 pounds.
Maibilang daytoy a kadagsenan a timbang ni Pacquiao sipud idi maika-uppat a panagsangoda kenni Juan Manuel Marquez idi Disyembre 2012.
Naudi a limmaban ni Pacquiao idi 2021, ngem naabak kenni Yordenis Ugas, babaen ti unanimous decision.
Kabayatanna, iti 30-anyos a ni Barrios ket naudi a limmaban idi Nobyembre napalabas a tawen, iti 12-round split draw kenni Abel Ramos.
Ni Pacquiao ket addaan ti 62 a panangabak, walo a pannaka-abak, dua a draw, ken addaan ti 39 knockouts bayat a ti 30-anyos nga American boxer a ni Barrios ket addaan ti 29 a panangabak, dua a pannaka-abak, maysa a draw, ken 18 knockouts.
Iti 46-anyos a Pacman ket gandaten na nga agawen ti WBC welterweight belt manipud kenni Barrios.
