BR LA UNION – Kinumpirma ni Sergey Lebedev, regional emergency minister ti Hydrometeorology Service (UGMS), iti napasamak a 3-4 meters a tsunami a timmama idiay Kamchatka kalpasan iti napigsa nga 8.8 magnitude a gingined.
Agarop alas-11:25 ti agsapa local time ita nga aldaw ti Miyerkoles, dinayyeg ti magnitude 8.8 a gingined iti eastern Kamchatka Peninsula idiay Russia.
Aguneg ti 20.7 kilometers ken tectonic in origin.
Nailista metten ti sumagmamano a serye ti napipigsa nga aftershocks iti lugar.
Iti inisyal a report, nagresulta ti napigsa a gingined iti pannakadadael ti maysa a kindergarten school idiay Petropavlovsk-Kamchatsky.
Iti agdama, saan pay a masinunuo iti kalawa ti perdisyon, nu adda casualty, iti timmama a napigsa a gingined.
Nang-isyu ti nalawa a tsunami warnings ken advisories iti sumagmamano a pagilian iti Pacific coasts kabilang iti Pilipinas, Indonesia, Japan ken Russia ken nabalakadan dagiti residente nga apektado nga umakar agturong iti nangato a lugar.
Kabayatanna, nakailista ti tsunami nga agngato ti 3-4 meters (10-13 feet) iti sumagmamano a paset ti Kamchatka idiay Russia ken nalayos idiay Severo-Kurilsk nga addaan ti 2,000 populasyon.
Idiay Japan, timmama ti umuna a wave nga agngato ti 30 sentimetro idiay siyudad ti Hokkaido idiay Northern Japan .
Timmama pay ti tsunami iti coastal areas iti Kuril Islands idiay Russia ken idiay northern island ti Hokkaido, Japan.
Nag-isyu met dagiti otoridad idiay Amerika ti tsunami warnings idiay Alaska ken Hawaii.
Epektibo metten ti tsunami watch iti US island territory ti Guam ken dadduma pay nga isla ti Micronesia.
Iti magnitude 8.8 a gingined a timmama idiay Russia ket maika-innem a kapigsaan a panagdayyeg a nailista iti intero a pakasaritaan ti lubong.
Sumarsaruno dagiti napigsa a panagdayyeg a timmama idi 2020 idiay Biobio, Chile a nakatayan ti 523 a tattao ken nakadadaelan ti 370,000 a babbalay ken panagdayyeg a timmama idi 1906 idiay Esmeraldas, Ecuador a nakatayan ti 1,500 a tattao ken narikna agingga idiay San Francisco.
