Naan-anayen a nagbalin a bagyo iti mabanbantayan a Low Pressure Area (LPA 07j) iti ruar ti Philippine Area of Responsibility (PAR) ken adda iti kategorya a “tropical depression.”
Nasaripatpatan daytoy iti kaadayo a nasurok-kumurang 1,060 km Daya-nga-Amianan ti Extreme Northern Luzon.
Segun kenni weather specialist Loriedin De la Cruz-Galicia, numanpay adayo pay iti kadagaan ti Pilipinas, asideg daytoyen iti beddeng ti PAR ken posible nga apagbiit a sumrek sakbay nga aglikaw ken agturong iti Amianan-a-Daya a direksyon.
No sumrek daytoy iti PAR ket maawagan kas “Fabian”, iti kaunaan a bagyo ita a bulan ti Agosto ken maika-innem ita a tawen 2025.
Awan pay iti direkta nga epekto daytoy iti pagilian, ngem manamnama a papigsaen na iti Southwest Monsoon wenno Habagat a mangipaay ti nalulem a tangatang, mawaras-waras a panagtudo, panagkimat ken panagguruod kadagiti sumagmamano a paset ti Luzon kas iti Ilocos Region, Batanes, Babuyan Islands, Zambales, ken Benguet.
Posible met a makapasar ti kellaat a panagtudo iti Metro Manila ken dadduma pay a paset ti Luzon gapo iti localized thunderstorms.
Idiay Visayas ken Mindanao, manamnama iti apagapaman agingana nalulem a tangatang ken sagpaminsan a panagtudo.
Kabayatanna, pinatta-patta ti state weather bureau a tallo a bagyo iti posible a sumrek ken mabukel iti uneg ti PAR ita a bulan ti Agosto ken agingana 16 a bagyo manipud Agosto agingana Disyembre.###
