Aprubadon ti Department of Education (DepEd) iti kanayunan a sweldo para kadagiti private school teachers iti sidong ti Teacher’s Salary Subsidy (TSS).
Manipud iti sigud nga P18,000 ket agbalin daytoyen a P24,000 a mangrugi ita nga school year 2025-2026, kas maiyanurot iti nagbalin a direktiba ni Presidente Ferdinand Marcos Jr. iti maikapat nga State of the Nation Address (SONA) partikular iti napintas a kalidad ken nangato a lebel ti edukasyon iti pagilian.
Segun kenni Education Secretary Sonny Angara, makitkita iti agdama iti pagkasapulan nga ipatas kadagiti private school proctors dagiti compensation a maaw-awat dagiti public school teachers para iti nasaysayaat a panagisuro.
Kabayatanna, iti TSS ket maysa laeng kadagiti components iti sidong ti Government Assistance to Students and Teachers in Private Education (GASTPE) program a mangsupsuporta kadagiti full-time licensed teachers nga empleyado dagiti pribado a pagadalan a paset iti Education Service Contracting (ESC) scheme iti uneg ti tallo nga oras tunggal lawas.
Mangipakpakita ti commitment iti nasao nga inisyatibo ti DepEd kangrunaan iti panangpapigsa iti suportada para kadagiti private education stakeholders.
Iti agdama, agtultuloy a makikokoordinar iti national government kadagiti lokal a gobierno, development partners, ken dagiti dadduma pay a private institutions para iti nasao a panggep.###
