BR LA UNION – Umaboten iti nasurok P1-billion ti balor dagiti nadadael iti benneg ti imprastraktura ken agrikultura nga imbati ti dimmuprak a bagyo Emong ditoy probinsiya ti La Union.
Maibasar daytoy iti inruar a datus ti Provincial Disaster Risk Reduction and Management Office (PDRRMO) idi Hulyo 31, 2025.
Iti nasao a datus, dumanon iti P1.1 bilyon a pisos iti infrastructure damage bayat a P145.6 milyon iti agriculture damage.
Kabayatanna, nasurok 120,000 a pamilya wenno buklen ti nasurok 300,000 nga indibiduwal iti naapektaran ti bagyo.
Dagitoy ket kangrunaan a naggapo iti 414 a barangay iti 18 nga ili ken maysa a siyudad ditoy La Union.
Partikular iti San Fernando City, Bacnotan, Balaoan, Bangar, Luna, San Gabriel, Santol, Sudipen, Bauang, Caba, Aringay, Agoo, Santo Tomas, Rosario, Pugo, Tubao, Naguilian, Burgos, ken Bagulin, La Union.
Nangibati pay ti bagyo Emong ti perdisyon a P4.7-million iti livestock and poultry ditoy La Union.
Maipalagip a naipasidong iti Signal #4 iti siyudad ti San Fernando, Bangar, Luna, Balaoan, Bacnotan, San Juan, Bauang, Caba, Aringay, Agoo, ken Santo Tomas iti panagduprak ti bagyo Emong idi Hulyo 25, 2025.
