Agpegpeggad a maikkat iti puesto ti pulis a nainaig iti insidente ti panangmolestiya ti maysa a kadete ti Philippine National Police Academy (PNPA).
Kasaruno daitoy ti panangipila ti kaso-kriminal ken administratibo kontra ti nasao nga opisyal nga agdama itan nga adda iti kustodiya dagiti otoridad manipud pay idi Hulyo 31.
Maibsar iti reklamo nga impila ti kadete, binartek isuna ti nasao a police officer ken ditoy na metten nga inaramid iti panangrames kenkuana.
Segun met iti National Police Commission (NAPOLCOM) Commissioner Vice Chairperson ken Executive Officer a ni Atty. Rafael Vicente Calinisan, napateg a maammoan ti pannakainaig dagiti pulis iti kakastoy nga aramid agsipud ta kangrunaan na ket nasken a saan da a mapalubosan a mairaman kadagiti kapada a wagas.
Innayon ni Calinisan a nakailanad iti sinapataan da a mandato a nasken ket isuda iti kangrunaan a tagasalaknib ken mangipapaay iti serbisyo iti publiko ken saan a mangar-aramid iti pakaisagmakan ti siasinoman.
Makitkita na met a dakkel a problema para ti intero a hanay ti kapulisan nu mapasingkedan a kaadwan kadagiti miembro da ket karaman iti kakastoy nga insidente. Nagtignay iti NAPOLCOM nga awan iti puesto iti akademya dagiti kastoy a pulis a mangiramraman ken mangisagsagmak iti peggad kadagiti kadete ti PNPA.
Rumbeng kunana a maisardengen dagiti kakastoy nga aramid ken dagos a mapagsungbat iti linteg dagiti pulis nga adda pakainaigan da kas paset metten iti panaglinis kadagiti madi iti aramid na iti uneg ti PNP.
