BR LA UNION – Pinaglibakan ni President Ferdinand Marcos Jr. a puppet state ti Estados Unidos iti Pilipinas.
Daytoy ket sungbat ti panang-dillaw ti China seknan iti nagtipon-pwersa a naval patrol ti India ken Pilipinas idiay West Philippine Sea itay kallabes.
Impaganetget ti Presidente nga adda kabukbukodan a pang-ruar a polisiya iti Pilipinas ken saan nga agtigtignay para iti sabali a pagilian.
Inlanad pay ni Presidente Marcos a pagrebbengan ti Pilipinas a depensaan iti teritoryo daytoy ken nu adda dagiti pagilian a nakasagana a tumulong kas ti Amerika, Australia, ken Japan, ket saanna a pagkedkedan.
Maipalagip nga iti umuna a gundaway, nangisayangkat ti maritime cooperation activity iti Pilipinas ken Indian Navies idiay WPS, banag a binabalaw ti China ken inawaganna pay ti India kas maysa a third party a saan a rumbeng a makibiang iti susik iti kabaybayan.
Immuna ti daytoy, agultuloy iti panangdillaw ti China iti defense cooperation ti Pilipinas iti sabali a pagilian ken ibilbilang iti isyu idiay West Philippine Sea kas paset iti maipagarop a mas nalawlawa a geopolitical tension kontra Estados Unidos, a nabayagen a kaalyado ti Pilipinas gaputi Mutual Defense treaty.
