Naartapan ti Kamara de Representantes babaen ti panangidaulo ni Speaker Ferdinand Martin G. Romualdez, iti trust ken satisfaction ratings ti Senado – maysa a pammaneknek a makitkita ti publiko iti nasayaat a panagtrabaho dagiti mangibagbagi ti Lower House.
Segun kenni Bicol Saro Rep. Terry Ridon, chairman ti House Committee on Public Accounts, nalawag iti kauddian a survey ti OCTA a saan a nakalibas iti mata ti publiko iti “steady, consistent work” ti Kamara.
Maibasar iti July 2025 OCTA survey, nakagun-od iti Kamara ti 57% trust rating manipud iti sigud a 49%, ken satisfaction rating a 55% manipud iti sigud a 47%. Naartapan daytoy iti Senado a nakailista ti 49% trust rating ken 47% satisfaction rating.
Innayon pay ni Ridon, kadawyan a nangatngato iti Senado iti kapada a pagarigan, ngem iti agdama ket nalawag a bunga daytoy ti agtultuloy a panangipamaysa ti Kamara kadagiti isyu a napateg para kadagiti Pilipino.#
