BR LA UNION – Pimmigsa ti bagyo Gorio iti typhoon category bayat nga agtultuloy a dup-dupagenna iti pa-laud agturong iti Philippine Sea.
Naudi a nasaripatpatan ti sentro ti bagyo iti kaadayu a 745 kilometro daya ti Itbayat, Batanes, kabuyog ti angin nga agpigsa ti 120 kilometro kada oras asideg iti sentro ken kapegges a dumanon iti 150 kilometro kada oras.
Nupay nababa iti posibilidad a direkta a maka-apektar ti bagyo Gorio iti kadagaan ti pagilian ti sumaruno a tallo nga aldaw, posible latta a maingato ti Tropical Cyclone Wind Signal iti Extreme Northern Luzon ingkaso nga agbaliw iti direksyon ti bagyo a pa-abagatan.
Iti agdama, agtultuloy iti direksiyon ti bagyo a pa-laud amianan-a-laud ken namnamaen nga ag-landfall iti daya a kabaybayan ti Taiwan inton bigat ti malem, Agosto 13, sakbay a naan-anay a rumwar iti Philippine Area of Responsibility rabii ti Miyerkoles.
Kabayatanna, namnamaen iti epekto ti bagyo iti kabaybayan.
Agbalin a nadawel ti kabaybayan idiay Batanes ket namnamaen ti kangato ti dalluyon agingga 5.5 metro bayat a maaddaan ti 3.5 metro a kangato ti dalluyon iti kabaybayan partikular iti amianan ken daya a paset ti Babuyan Islands.
Amin a klase ti lugan pangtaaw kadagiti nasao a lugar ket mabalakadan a saan pay laeng nga agpataaw.
Makapadas met iti kalalainganna a panagdalluyon iti nabatbati a paset ti Babuyan Islands, amianan-a-daya ti Cagayan, Isabela, ken amianan-a-daya ti Aurora, isunga mabalakadan dagiti mangngalap ken mariners nga agannad ken liklikan pay laeng ti tumapog iti kabaybayan.
