Inwaragawag ni Armed Forces of the Philippines (AFP) chief General Romeo Brawner Jr. a nilabsing ti China ti katulagan na iti Pilipinas idi tawen 2012 babaen iti panangipatulod ti barko-panggubat wenno warship idiay Scarborough Shoal idi aldaw ti Lunes, Agosto 11.
Inlawlawag ti AFP chief nga adda iti agraraira a katulagan ti Pilipinas ken China nga ikkaten dagiti Navy ships iti nasao a lugar. Immanamong ditoy ti Pilipinas ngem insubli met ti China dagiti warship manipud People’s Liberation Army – Navy (PLA-N).
Maipalagip nga idi tawen 2012, nagbalin nga epektibo ti katulagan ti nagbaetan dagiti dua a pagilian kasaruno dagiti sumagmamano metten a bulan a panagkinkinnigla da wenno standoff iti nasao a shoal. Naikeddeng daitoy babaen ti panagsapata ti nagsinnumbangir a dasig nga iyatras dagiti barko da.
Kinunana a nagraira iti AFP ti nangato a morale iti ground kas maiyannurot iti pammilin ni Presidente Ferdinand Marcos Jr. ken saan da pulos a nangar-aramid ti aniaman nga agresibo a taktika.
Nupay kasta, ita a nakaunan dagiti Chinese Navy vessels iti nasao a lugar ket sabali a saritaanen ken prolema daitoy.
Makitkita ni General Brawner iti insidente idi Lunes kas maysa a senyales ti panagbalbaliw ti China iti taktika da ken itan ket agparparang nga iti panangipatulod da kadagiti barko-panggubat ket nalawag a pangilasinan iti klase ti agresyon.
